2018 çулхи авăн уйăхĕнче Чăваш Республикин вĕренÿ тата çамрăксен политикин министерствипе Чăваш Республикин вĕренÿ институтчĕ «Яковлев эткерлĕхне эпĕ епле упратăп» темăпа сочиненисен конкурсне ирттерчĕç. Конкурса республика шкулĕсенче вăтам тата аслă классенче вĕренекен тата вăтам професси пĕлĕвĕ паракан вĕренÿ организацийĕсенче пĕлÿ пухакан 81 çамрăк хутшăннă (пĕтĕмпе 17 районпа хуларан 52 вĕренÿ организацийĕ).

Ĕçсенчен 39-шне (55 %) чăвашла çырнă, 32-шне (45 %) вырăсла калăпланă. Конкурса хутшăнакансенчен 3-шĕ – 8 класра, 28-шĕ – 9-мĕш класра, 20-шĕ – 10-мĕш класра, 14-шĕ – 11-мĕш класра, 6-шĕ техникумра вĕренет. Тăтăшлăхне илес пулсассăн Вăрмар (8 ĕç), Муркаш (6 ĕç), Шăмăршă (5 ĕç), Красноармейски, Сĕнтĕвăрри, Тăвай (3-шер ĕç) районĕсене тата Шупашкар хулине (20 ĕç) палăртса хăварнă..

«Яковлев эткерлĕхне эпĕ епле упратăп» пысăк темăпа ĕçлеме ачасене çăмăлрах пултăр тесе конкурс йĕркелевçисем çак пысăк темăпа çыхăннă   вакрах темăсем сĕннĕ: «Тăван сăмах – иксĕлми пуянлăх», «Халăхсем туслă пулсан çĕр-шыв çирĕп», «Тĕнче илемĕ чун пуянлăхĕнчен килет».

Мĕн çинчен çырасси паллă пулин те, жюри шучĕпе, чи йывăр тема «Тăван сăмах – иксĕлми пуянлăх» тема пулнă. Апла пулин те чылай ача чăваш чĕлхин пуласлăхĕ хамăртан килет тесе тĕрĕс пĕтемлет́ÿ тунă.

Пирĕн шкулта 9-мĕш класра вĕренкен Денис Иванов çак конкурсра çĕнтерÿçĕ ята тивĕç пулчĕ. Çав ятпа саламлатпăр ăна, малашне те пысăк çитĕнÿсем тума сунатпăр.