Пикшик вăтам шкулĕнче Чăваш чĕлхи кунне пуçлаканĕсем Красноармейски районĕн ĕçпе вăрçă ветеранĕсен канашĕн президиумĕн членĕсем пулчĕç. Уява Пикшик ял тăрăхĕн пуçлăхĕ В.Ю.Фомин салам сăмахĕпе уçрĕ, ĕçпе вăрçă ветеранĕсен канашĕн президиумĕн председалĕ Г.Тусли ертсе пычĕ. Вăлах И.Я.Яковлевăн халалне тĕпе хурса пурнăçа йĕркелеме пĕлмеллине ача чĕлхипе ăнлантарчĕ. 

Районти культура çурчĕ çумĕнчи халăх театрĕн режиссерĕ К.И.Васильева Сталинград паттăрĕсене халалласа çырнă хайлавĕпе паллаштарчĕ, сăввийĕсене кашнин чунне пырса тивмелле вуларĕ. Пикшик шкулне "Сталинградра" тата "Виçĕ упа" видеофильм парнелесе хăварчĕ.

Красноармейски районĕн ĕçпе вăрçă ветеранĕсен канашĕн çумĕнчи юрăпа ташă ушкăнĕн юрăçи В.М.Волков хăйĕн уçă сассипе чăваш юррисене шăрантарса хăй ÿсĕмĕнчи çынсене самантлăха çамрăклăха таврăнма пулăшрĕ. Г.И.Егорова вара çепĕç сассипе чун-чĕрене тыткăнларĕ, чи çепĕç туйăмсене вăратрĕ. Г.Тусли хăйĕн хут купăсне тăсса ярса сăвăлама тытăнсан чăваш чăтаймарĕ: кам ташша тухрĕ, кам такмак каларĕ. кам алă çупса хавхалантарчĕ.

Уяв, ĕçпе вăрçă ветеранĕсен канашĕн президиумĕн членĕ А.И.Дмитриева сĕннипе, "Яланах пултăр хĕвел" юрра пурте ура çине тăрса шăрантарнипе вĕçленчĕ. Уява килнисене ку шкулта чăваш чĕлхипе литературине вĕрентекен Л.А. Тихонова тепĕр хут Чăваш чĕлхи кунĕ ячĕпе саламларĕ, хастар хăнасене çĕре çити пуç тайса тав турĕ.